གནའ་དུས་སོ་ནམ་པ་ཞིག་ཡོད་པ་དེ་ཉིན་ཞིག་ཞིང་ཁའི་ནང་ཡུར་མ་རྒྱག་སྐབས། བློ་བུར་དུ་ནགས་གསེབ་ནས་རི་བོང་ཞིག་དངངས་སྐྲག་ཆེན་པོས་རྒྱུགས་ཡོང་སྟེ། ཉེར་འགྲམ་གྱི་ཤིང་སྡོང་ལ་རྡུང་ཁ་ཐེབས་ནས་ཤི་བ་མཐོང་།

སོ་ནམ་པ་དེ་ལ་དཀའ་བ་ཅུང་ཟད་ཙམ་ཡང་རྒྱག་མི་དགོས་པར་རྒྱགས་ཤིང་ཆེ་བའི་རི་བོང་གི་རོ་ཞིག་ཐོབ། དེར་བརྟེན་ཁོ་དགའ་སྤྲོ་ཆེན་པོའི་ངང་ཁྱིམ་དུ་ལོག་ནས་ཉིན་ལྟར་རི་བོང་རེ་རྙེད་ན་དགའ་བ་ལ་ཨང་སྙམ།

དེ་ནས་བཟུང་ཁོས་ཉིན་ལྟར་ཤིང་སྡོང་གི་འོག་ཏུ་རི་བོང་བསྒུགས་ནས་བསྡད། དེ་འདྲའི་ངང་དུས་འདས་ནས་རི་བོང་ཡོང་རྒྱུ་ལྟ་ཅི། ཞིང་ཁའི་ནང་རྩ་ངན་གྱིས་ཁེངས་ཏེ་ལོ་ཐོག་ཀྱང་བསྡུ་རྒྱུ་མ་བྱུང་བ་རེད།།